1/02/2013 12:44:00 pm
Unknown
مولانا ڈاکٹر محمد عبد الحئ عارفیؔ کے
چند نعتیہ اشعار:
جذب کر لے میری ہستی اپنے ہر انداز
ہاں مجھے بھی رنگ لے اپنے رنگ میں اے کوئے دوست
عارفیؔ بس اب یہی ہے آرزوئے زندگی
کاش میرا شغل ہو ہر دم طوافِ کوئے دوست
٭٭٭
مرا کیف نغمۂ دل، مرا ذوق شاعرانہ
ترے حسن کا ترنم، ترے عشق کا ترانہ
ترے حسن کی عطا ہے، ترے عشق کا صلہ ہے
مری آہ صبحگاہی، مرا نالۂ شبانہ
تری یاد دے اجازت تو بتاؤں میں کہ ہے کیوں
مرا ہر نفس حقیقت، مرا ہر نفس فسانہ
تری یاد کی خلش ہو، ترے ذکر کی تپش ہو
مرے اشکہائے غم کو کوئی چاہیے بہانہ
ترا ذکر روح پرور ہے زبانِ عارفیؔ پر
بہ تو اے محرمانہ، بحدیثِ دیگرانہ
٭٭٭
ہر ذرّہ ترے کوچہ کا آنکھوں سے لگا لوں
ممکن ہے کسی پر ترا نقشِ کفِ پا ہو
٭٭٭
جب کبھی وہ ادھر سے گذرے ہیں1؎
کتنے عالم نظر
سے گذرے ہیں
بس گئی ہے فضا میں نکہتِ حسن
وہ جہاں بھی جدھر سے گذرے ہیں
کتنے دلکش ہیں ان کے نقشِ قدم
جو تری رہگذر سے گذرے ہیں
نت نئے حسنِ یار کے جلوے
میری شام و سحر سے گذرے ہیں
دل پہ اک تازہ چوٹ کھائی ہے
جب بھی ہم ان کے در سے گذرے ہیں
جب بھی گذرے ہیں وہ تصور میں
پردۂ چشمِ تر سے گذرے ہیں
عارفیؔ ہم کو بھی ہے اس پر ناز
ہم بھی ان کی نظر سے گذرے ہیں
1؎ جناب نیازؔ فتح پوری لکھتے ہیں
"اس غزل کا مطلع و خیر ملہمات سے تعلق رکھتا ہے۔"
(ملاحظہ ہو: رسالہ نگارؔ، پاکستان بابت
ماہ اکتوبر 1965ء)
٭٭٭
کب تک آخر یورشِ افکار کی باتیں کریں
آؤ اب کچھ دیر بزمِ یار کی باتیں کریں
اپنے دل کو اپنی خلوت کا بنا کر ہم نشیں
چپکے چپکے حسن و عشقِ یار کی باتیں کریں
عشق کی رنگین فضاؤں کے ترانے چھیڑ دیں
حسن کے پُر کیف جلوہ زار کی باتیں کریں
پیچ و تابِ غم کو دل سے محو کر دیں سر بسر
ہو کے بیخود چشمِ مستِ یار کی باتیں کریں
پہلے جان و دل میں بھر لیں مستئ صہبائے شوق
پھر کسی کی لذتِ گفتار کی باتیں کریں
تلملا کر دل کی ہر خوابیدہ حسرت جاگ اٹھے
یوں کی شوخیِ رفتار کی باتیں کریں
عارفیؔ وارفتگئ دل ہی جو چاہے کرے
ورنہ ہم اور اپنی جانِ زار کی باتیں کریں
٭٭٭
Posted in 
Posts
