نقشِ فریادی: March 2012

نہ حریفِ جاں نہ شریکِ غم شبِ انتظار کوئی تو ہو

3/30/2012 09:49:00 am

Unknown

غزل

نہ حریفِ جاں نہ شریکِ غم شبِ انتظار کوئی تو ہو

کسے بزمِ شوق میں لائیں ہم دلِ بے قرار کوئی تو ہو

کسے زندگی ہے عزیز اب کسے آرزوئے شبِ طرب

مگر اے نگارِ وفا طلب ترا اعتبار کوئی تو ہو

کہیں تارِ دامنِ گل ملے تو یہ مان لیں کہ چمن کھلے

کہ نشان فصلِ بہار کا سرِ شاخسار کوئی تو ہو

یہ اداس اداس سے بام و در، یہ اجاڑ اجاڑ سی رہگزر

چلو ہم نہیں نہ سہی مگر سرِ کوئے یار کوئی تو ہو

یہ سکونِ جاںکی گھڑی ڈھلے تو چراغِ دل ہی نہ بجھ چلے

وہ بلا سے ہو غمِ عشق یا غمِ روزگار کوئی تو ہو

سرِ مقتلِ شب آرزو، رہے کچھ تو عشق کی آبرو

جو نہیں عدو تو فراز تو کہ نصیب دار کوئی تو ہو

(احمد فراز)

(دردِ آشوب)

مزید پڑھیے ۔۔۔۔

Posted in احمد فراز

جُز ترے کوئی بھی دن رات نہ جانے میرے

3/30/2012 09:46:00 am

Unknown

غزل

جُز ترے کوئی بھی دن رات نہ جانے میرے

تُو کہاں ہے مگر دوست پرانے میرے

تُو بھی خوشبو ہے مگر میرا تجسس بے کار

برگِ آوارہ کی مانند ٹھکانے میرے

شمع کی لَو تھی کہ وہ تُو تھا مگر ہجر کی رات

دیر تک روتا رہا کوئی سرہانے میرے

خلق کی بے خبری ہے کہ مری رسوائی

لوگ مجھ کو ہی سناتے ہیں فسانے میرے

لُٹ کے بھی خوش ہوں کہ اشکوں سے بھرا ہے دامن

دیکھ غارت گرِ دل یہ بھی خزانے میرے

آج اک اور برس بیت گیا اس کے بغیر

جس کے ہوتے ہوئے ہوتے تھے زمانے میرے

----ق----

کاش تُو بھی مری آواز کہیں سُنتا ہو

پھر پکارا ہے تجھے دل کی صدا نے میرے

کاش تو بھی کبھی آ جائے مسیحائی کو

لوگ آتے ہیں بہت دل کو دُکھانے میرے

کاش اوروں کی طرح میں بھی کبھی کہہ سکتا

بات سُن لی ہے مری، آج خدا نے میرے

تُو ہے کس حال میں اے زود فراموش مرے

مجھ کو تو چھین لیا عہدِ وفا نے میرے

چارہ گر یوں تو بہت ہیں مگر اے جانِ فراز

جز ترے اور کوئی زخم نہ جانے میرے

(احمد فراز)

(دردِ آشوب)

مزید پڑھیے ۔۔۔۔

Posted in احمد فراز

معبود

3/30/2012 09:42:00 am

Unknown

معبود

بہت حسین ہی تیری عقیدتوں کے گلاب

حسین تر ہے مگر ہر گلِ خیال ترا

ہم ایک درد کے رشتے میں منسلک دونوں

تجھے عزیز مرا فن، مجھے جمال ترا

مگر تجھے نہیں معلوم قربتوں کے الم

ترے نگاہ مجھے فاصلوں سے چاہتی ہے

تجھے خبر نہیں شاید کہ خلوتوں میں مری

لہو اگلتی ہوئی زندگی کراہتی ہے

تجھے خبر نہیں شاید کہ ہم وہاں ہیں جہاں

یہ فن نہیں اذیت ہے زندگی بھر کی

یہاں گلوئے جنوں پر کمند پڑتی ہے

یہاں قلم کی زباں پر ہے نوک خنجر کی

ہم اس قبیلہءوحشی کہ دیوتا ہیں کہ جو

پجاریوں کی عقیدت پہ پھول جاتے ہیں

اور ایک رات کے معبود صبح ہوتے ہی

وفا پرست صلیبوں پہ جھول جاتے ہیں

(احمد فراز)

(دردِ آشوب)

مزید پڑھیے ۔۔۔۔

Posted in احمد فراز

قربتوں میں بھی جدائی کے زمانے مانگے

3/29/2012 10:37:00 pm

Unknown

غزل

قربتوں میں بھی جدائی کے زمانے مانگے

دل وہ بے مہر کہ رونے کے بہانے مانگے

ہم نہ ہوتے تو کسی اور کے چرچے ہوتے

خلقتِ شہر تو کہنے کو فسانے مانگے

یہی دل تھا کہ ترستا تھا مراسم کے لئے

اب یہی ترکِ تعلق کے بہانے مانگے

اپنا یہ حال کہ جی ہار چکے لٹ بھی چکے

اور محبت وہی انداز پرانے مانگے

زندگی ہم ترے داغوں سے رہے شرمندہ

اور تُو ہے کہ سدا آئینہ خانے مانگے

دل کسی حال پہ قانع ہی نہیں جانِ فراز

مِل گئے تم بھی تو کیا اور نہ جانے مانگے

(احمد فراز)

(دردِ آشوب)

مزید پڑھیے ۔۔۔۔

Posted in احمد فراز

مشورہ

3/29/2012 04:18:00 pm

Unknown

مشورہ

ایک مشاعرے کے اختتام پر جب ایک نامر شاعر کو طے شدہ معاوضے سے کم رقم دی گئی تو وہ منتظمین پر پھٹ پڑے۔

'' میں اس رسید پر دستخط نہیں کر سکتا۔"

مجاز بھی وہیں موجود تھے۔ وہ نہایت معصومیت سے منتظم سے بولے

"اگر یہ دستخط نہیں کر سکتے تو ان سے انگوٹھا ہی لگوا لو۔"

مزید پڑھیے ۔۔۔۔

Posted in ادبیات

فنکاروں کے نام

3/29/2012 09:46:00 am

Unknown

فنکاروں کے نام

تم نے دھرتی کے ماتھے پہ افشاں چُنی

خود اندھیری فضاﺅں میں پلتے رہے

تم نے دنیا کے خوابوں کی جنت بُنی

خود فلاکت کے دوزخ میں جلتے رہے

تم نے انسان کے دل کی دھڑکن سُنی

اور خود عمر بھر خوں اُگلتے رہے

جنگ کی آگ دنیا میں جب بھی جلی

امن کی لوریاں تم سناتے رہے

جب بھی تخریب کی تُند آندھی چلی

روشنی کے نشاں تم دکھاتے رہے

تم سے انساں کی تہذیب پھولی پھلی

تم مگر ظلم کے تیر کھاتے رہے

تم نے شہکار خونِ جگر سے سجائے

اور اس کے عوض ہاتھ کٹوا دیئے

تم نے دنیا کو امرت کے چشمے دکھائے

اور خود زہرِ قاتل کے پیالے پیے

تم مرے تو زمانے کے ہاتھوں سے وائے

تم جیے تو زمانے کی خاطر جیے

تم پیمبر نہ تھے عرش کے مدعی

تم نے دنیا سے دنیا کی باتیں کہیں

تم نے ذروں کو تاروں کی تنویر دی

تم سے گو اپنی آنکھیں بھی چھینی گئیں

تم نے دُکھتے دلوں کی مسیحائی کی

اور زمانے سے تم کو صلیبیں ملیں

کاخ و دربار سے کوچہءدار تک

کل جو تھے آج بھی ہیں وہی سلسلے

جیتے جی تو نہ پائی چمن کی مہک

موت کے بعد پھولوں کے مرقد ملے

اے مسیحاﺅ! یہ خود کشی کب تلک

ہیں زمیں سے فلک تک بڑے فاصلے

(احمد فراز)

(دردِآشوب)

مزید پڑھیے ۔۔۔۔

Posted in احمد فراز

دیار نور میں تیرہ شبوں کا ساتھی ہو

3/28/2012 05:35:00 pm

Unknown

غزل

دیار نور میں تیرہ شبوں کا ساتھی ہو

کوئی تو ہو جو میری وحشتوں کا ساتھی ہو

میں اس سے جھوٹ بھی بولوں تو مجھ سے سچ بولے

میرے مزاج کے سب موسموں کا ساتھی ہو

میں اس کے ہاتھ نہ آؤں اور وہ میرا ہو کے رہے

میں گر پڑوں تومیری پستیوں کا ساتھی ہو

وہ میرے نام کی نسبت سے معتبر ٹھہرے

گلی گلی میری رسوائیوں کا ساتھی ہو

کرے کلام مجھ سے تو میرے لہجے میں

میں چپ رہوں تو میرے تیوروں کا ساتھی ہو

میں اپنے آپ کو دیکھوں اور وہ مجھ کو دیکھے جائے

وہ میرے نفس کی گمراہیوں کا ساتھی ہو

وہ خواب دیکھے تو دیکھے میرے حوالے سے

میرے خیال کے سب منظروں کا ساتھی ہو

(افتخار عارف)

مزید پڑھیے ۔۔۔۔

Posted in افتخار عارف

بائیسکل

3/27/2012 05:48:00 pm

Unknown

بائیسکل

اکبر الہٰ آبادی کے ایک عزیز بائیسکل سے گر پڑے اور ہفتہ بھر بستر پر رہے۔ جب تندرست ہو کر اکبر الہٰ آبادی سے ملنے گئے تو وہ کہنے لگے۔

بُرا ہوا! اب مجھے کوئی کچھ کہے لیکن مجھے عہدِ حاضر کی اچھی سے اچھی ایجاد میں بھی نقصان کا کوئی نہ کوئی پہلو ضرور نظر آتا ہے، خواہ موٹر ہو یا ہوائی جہاز۔۔۔ اب بائیسکل کو ہی دیکھ لو، مرض ”بائی“ سے شروع ہوتا ہے، پھر ”سک“ ہوتا ہے، پھر ”ال“ بنتا ہے، یوں بائیسکل بنتا ہے۔

مزید پڑھیے ۔۔۔۔

Posted in ادبیات

قاتل سپاہی

3/27/2012 04:50:00 pm

Unknown

قاتل سپاہی

دوپہر کے ساڑھے بارہ بجے ہیں، جون کا مہینہ ہے، سمن آباد کی گلیوں میں ایک ڈاکیا پسینے میں شرابور بوکھلایا بوکھلایا پھر رہا ہے۔محلے کے لوگ بڑی حیرت سے اس کی طرف دیکھ رہے ہیں۔اصل میں آج اس کی ڈیوٹی کا پہلا دن ہے۔ وہ کچھ دیر اِدھر اُدھر دیکھتا رہا پھر ایک پرچون والے کی دکان

کے پاس سائیکل کھڑی کر کے دکاندار کی طرف بڑھتا ہے۔

“قاتل سپاہی کا گھر کون سا ہے؟”

اس نے آہستہ سے پوچھا اور'' ”دکاندار کے پیروں تلے زمین نکل گئی، اس کی آنکھیں خوف سے ابل پڑیں۔ ”قق.....قاتل.....سس.....سپاہی مجھے کیا پتا.....“ اس نے جلدی سے دکان کا شٹر گرا دیا۔ڈاکیا پھر پریشان ہو گیا۔ اس نے بڑی کوشش کی کہ کسی طریقے سے قاتل سپاہی کا پتا چل جائے لیکن جو کوئی بھی اس کی بات سنتا چپکے سےکھسک جاتا، ڈاکیا نیا تھا، نہ جان نہ پہچان اور اوپر سے”قاتل سپاہی“ کے نام کی رجسٹری.....آخر وہ کرے تو کیا کرے.....کہاں سے ڈھونڈے قاتل سپاہی کو.....اس نے پھر سے نام پڑھا۔ نام اگر چہ انگلش میں لکھا ہوا تھا لیکن آخر کار وہ بھی مڈل پاس تھا، تھوڑی بہت انگلش تو سمجھ سکتا تھا۔ بڑے واضح الفاظ میں”قاتل سپاہی، غا لب اسٹریٹ، سمن آ باد“ لکھا ہوا تھا۔ دو گھنٹے تک گلیوں کی خاک چھاننے کے بعد وہ ہانپنے لگااور تھک ہار کر ایک مکان کے باہر بنے تھڑے پر بیٹھ کر لمبی لمبی سانسیں لینے لگا۔ڈیوٹی کے پہلے ہی روز اسے ناکامی کا سامنا ہورہا تھا، اور اب وہ اپنے پوسٹ ماسٹر کو کیا منہ دکھائے گا۔ اس کا حلق خشک ہو گیا۔ اسے پانی کی طلب محسوس ہوئی۔ وہ بے اختیار اٹھا اور گھر کے دروازے پر لگی بیل پر انگلی رکھ دی۔اچانک اسے ایک زور کا جھٹکا لگا۔ جھٹکے کی وجہ یہ نہیں تھی کہ بیل میں کرنٹ تھا، بلکہ بیل کے نیچے لگی نیم پلیٹ پر انگلش میں

QATIL SHIPAHI “قاتل سپاہی”

لکھا ہواتھا۔خوشی کی ایک لہر اس کے اندر دوڑ گئی۔ اتنی دیر میں دروازہ کھلا اور ایک نوجوان باہر نکلا۔ ڈاکئے نے جلدی سے رجسٹری اس کے سامنے کر دی

“کیا یہ آپ ہی کا نام ہے؟”

نوجوان نے نام پڑھا اور کہا ”نہیں.....یہ میرے دادا ہیں “۔

مزید پڑھیے ۔۔۔۔

Posted in ادبیات

پرکھنا مت ،پرکھنے سے کوئی اپنا نہیں رہتا

3/26/2012 11:45:00 am

Unknown

غزل

پرکھنا مت ،پرکھنے سے کوئی اپنا نہیں رہتا

کسی بھی آئینے میں دیر تک چہرہ نہیں رہتا

بڑے لوگوں سے ملنے میں ہمیشہ فاصلے رکھنا

جہاں دریا سمندر سے ملا، دریا نہیں رہتا

ہزاروں شعر میرے سو گئے کاغذ کی قبروں میں

عجب ماں ہوں کوئی بچہ میرا زندہ نہیں رہتا

تمہارا شہر تو بالکل نئے انداز والا ہے

ہمارے شہر میں بھی اب کوئی ہم سا نہیں رہتا

محبت ایک خوشبو ہے ہمیشہ ساتھ چلتی ہے

کوئی انسان تنہائی میں بھی تنہا نہیں رہتا

کوئی بادل ہرے موسم کا پھر اعلان کرتا ہے

خزاں کے باغ میں جب ایک بھی پتہ نہیں رہتا

(بشیر بدر)

مزید پڑھیے ۔۔۔۔

Posted in بشیر بدر

اے شاعرِ مشرق

3/26/2012 11:40:00 am

Unknown

بہت دکھ اور کرب کے ساتھ اجمل نذیر کی یہ نظم آپ سب کی خدمت میں پیش کر رہا ہوں کہ شاعرِ مشرق کے افکار کے ساتھ ہم نے کیا حال کیا۔ مگر ساتھ ہی یہ عزم بھی ہے کہ ہم آئندہ کسی بھی لکھنے والے کو اس طرح کی کوئی بھی تحریر لکھنے کا موقع نہیں دیں گے۔ٍ

اے شاعرِ مشرق

اے شاعرِ مشرق ترے افکار و تخیل

بہتے ہوئے دھارے تھے کسی موجِ رواں کے

تا دیر اثر خیزی کا ساماں بھی وہی تھے

جو تیر تھے کچھ فہم و فراست کی کماں کے

ڈھونڈے نہ کبھی حرف و صداقت کے معنی

اپنائے ہیں غیروں کے سے انداز نہ سمجھے

تقلید کے دھوکے میں مٹا ڈالی ہے تہذیب

ملت کے تقاضوں کے حسیں راز نہ سمجھے

ہم منزلِ مقصود پہ پہنچے نہ لگن سے

نعروں سے لیا کام ہنر تک نہیں پہنچے

تکمیلِ تمنا کے لئے شوق بڑا تھا

پر قوتِ بازو کے اثر تک نہیں پہنچے

مجرم ہیں گہر ہم نے گراں مایہ بہ حکمت

بے نام مسافت کے جھمیلوں میں گنوائے

برسوں سے روش اپنی غلامانہ رہی ہے

ایسے میں بھلا اپنی خودی کون جگائے

اے شاعرِ مشرق ترے احساس کی دولت

اے کاش کہ سینوں میں اتر جائے ہمارے

مایوسی کا عالم ہو کبھی ختم خدارا

امیدوں کی کشتی بھی لگے آ کے کنارے

ہو اپنا یقیں تیری تمنا کے مطابق

پھر کون بھلا غیر سے مانگے گا سہارے

یک جہتی سے منزل کی طرف ایسے رواں ہوں

گردوں سے خدا اپنے ملائک بھی اتارے

(اجمل نذیر)

مزید پڑھیے ۔۔۔۔

Posted in علامہ اقبال

اقبال ؒ! ترے دیس کا کیا حال سناﺅں

3/26/2012 11:37:00 am

Unknown

اقبال ؒ! ترے دیس کا کیا حال سناﺅں

دہقان تو مر کھپ گیا اب کس کو جگاﺅں

ملتا ہے کہاں خوشہءگندم کہ جلاﺅں

شاہین کا ہے گنبدِ شاہی پہ بسیرا

کنجشک فرومایہ کو اب کس سے لڑاﺅں